प्रथम देवचुली खुला फुटबल प्रतियोगिता : साथीभाइ युवा क्लब सेमिफाइनल प्रवेश

देवचुली । देवचुली नगरपालिका वडा नम्बर १४ मा संचालित प्रथम देवचुली खुला फुटबल प्रतियोगितामा साथीभाइ युवा क्लब सेमिफाइनल प्रवेश गरेको छ । विजयादशमी तथा शुभ दिपावलीको अवसरमा देवचुली दलित युवा समाजको आयोजनामा देवचुली १४ को जन ज्योति नमुना माविको खेलमैदानमा अभिषेक चर्च रजहरका विरुद्ध साथीभाइ युवा क्लब बीच भएको खेलमा साथीभाइ युवा क्लब विजयी भएको हो ।

साथीभाइ युवा क्लबले अभिषेक चर्च रजहरलाई ट्राइबेकरमा ५-३ गोल अन्तरले हराउँदै सेमिफाइनल प्रवेश गरेको हो । निर्धारित समयको खेलमा दुवै टिमबाट गोलरहित बराबरी भएपछि खेल ट्राइबेकरमा गएको थियो। मंगलबारको खेलमा साथीभाइ युवा क्लबका गोलरक्षक विशाल घिमिरे म्यान अफ दि म्याच भएका थिए ।

प्रतियोगितामा प्रथम हुने टिमले नगद ६० हजार रुपैयाँसहित मेडल, ट्रफी र प्रमाणपत्र प्राप्त गर्नेछ भने द्वितीय हुने टिमले नगद ३० हजार रुपैयाँँ सहित मेडल, ट्रफी र प्रमाणपत्र प्राप्त गर्नेछ । त्यसै गरि प्रतियोगिताका उत्कृष्ट खेलाडी, सर्वोकृष्ट गोलरक्षक र सर्वाधिक गोलकर्तालाई पुरस्कारको व्यवस्था रहेको आयोजक समाजका अध्यक्ष राकेश बिकले जानकारी दिए । प्रतियोगिता संचालनबाट बचत भएको रकमबाट विपन्न विद्यार्थीहरुलाई न्यानो कपडा वितरण गर्ने उद्देश्य समेत रहेको उनले बताए ।

प्रतियोगिता अन्तरगत बुधबार साविक पिठौलीका विरुद्ध साथीभाइ युवा क्लबबीच पहिलो सेमिफाइनल र पृथ्वी समाज सेवा क्लबका विरुद्ध देवचुली दलित युवा समाजबीच दोस्रो सेमिफाइनल हुने आयोजकले जनाएको छ।