आज: २०८१ मंसिर ६, बिहिबार | Thu, 21, Nov, 2024 Search
देवचुली । देवचुली होटल व्यवसाय संघद्वारा शुभकामना आदानप्रदान कार्यक्रम गरिएको छ । नेपालीहरुको महान चाड विजयादमी, शुभ दिपावली, छठ, नेपाल संवत् लगायत सम्पूर्ण चाडपर्वको अवसरमा आइतबार देवचुली १२ को कालिका मन्दिरमा शुभकामना आदान प्रदान कार्यक्रम सम्पन्न गरिएको हाे ।
देवचुली होटल व्यवसाय संघका अध्यक्ष लक्ष्मण चापागाईको अध्यक्षतामा भएको कार्यक्रममा देवचुली नगरपालिकाका नगरप्रमुख हरिप्रसाद न्यौपानेको प्रमुख आतिथ्यता रहेको थियो । त्यसै गरि देवचुली १२ का वडा अध्यक्ष लोकप्रसाद भुर्तेल, प्रगतिनगर खानेपानी तथा सरसफाइ उपभोक्ता संस्थाका अध्यक्ष खिमानन्द भुसाल, मौलाकालिका होटल व्यवसाय संघका अध्यक्ष देवीप्रसाद पौडेल लगायत होटल व्यवसायीहरुको उपस्थिति रहेको थियो ।
कार्यक्रममा बोल्दै प्रमुख अतिथि नगर प्रमुख न्यौपानेले अहिलेको व्यवसायिक जटिलताको समयमा पनि होटल व्यवसाय संघले व्यवसायीलाई साथमा लिएर अगाडि बढेको देख्दा खुशी लागेकाे बताउनुभएको थियो । उहाँले देवचुली होटल व्यवसाय संघले गर्ने घुम्ती कार्यक्रममा विगतमा पनि सहयोग गरेको बताउँदै नयाँ योजना सहितका कार्यक्रममा पनि नगरपालिकाको पूर्ण समर्थन रहने बताउनुभएको थियो ।
शुभकामना कार्यक्रममा बोल्ने वक्ताहरुले देवचुली होटल व्यवसाय संघले गर्ने विभिन्न कार्यक्रम सिर्जनात्मक रहेको बताउँदै आगामी दिनमा पनि सामाजिक कार्यमा संस्था यसरी नै लाग्न शुभकामना दिनुभएको थियो । देवचुली होटल व्यवसाय संघका सचिव खुमलाल भुर्तेलले स्वागत मन्तव्य राख्नुभएको कार्यक्रममा संघका वरिष्ठ उपाध्यक्ष भोजराज ज्ञवालीले सहजीकरण गर्नुभएको थियो ।
