आज: २०८१ मंसिर ६, बिहिबार | Thu, 21, Nov, 2024 Search
देवचुली । नेपाल राष्ट्रिय शिक्षक संगठन देवचुली नगर समितिले शुभकामना आदानप्रदान कार्यक्रम सम्पन्न गरेको छ । नेपालीहरुको महान पर्व विजयादशमी, शुभ दिपावली, छठ पर्वको अवसरमा शनिबार नेपाल नमूना माविमा शुभकामना आदानप्रदान कार्यक्रम गरिएको हो ।
नेपाल राष्ट्रिय शिक्षक संगठन देवचुलीका अध्यक्ष हेराबहादुर केसीको अध्यक्षतामा भएको शुभकामना कार्यक्रममा नेपाल राष्ट्रिय शिक्षक संगठनका केन्द्रिय प्रतिनिधि शिवप्रसाद देवकोटाको प्रमुख आतिथ्यता रहेको थियो । त्यसै गरि नेपाल राष्ट्रिय शिक्षक संगठनका जिल्ला उपाध्यक्ष सरस्वती अर्याल, नेपाल राष्ट्रिय शिक्षक संगठन देवचुलीका पुर्व अध्यक्ष देवेन्द्रमणि त्रिपाठी लगायत संगठनमा आबद्ध शिक्षकहरुको उपस्थिति रहेको थियो ।
शुभकामना आदानप्रदान कार्यक्रममा बोल्दै प्रमुख अतिथि शिवप्रसाद देवकोटाले संगठनमा आबद्ध शिक्षकहरु अझै धेरै इमान्दार र कर्तव्यनिष्ठ हुनुपर्ने बताउँदै संगठन शिक्षकहरुको हकहितका लागि क्रियाशील रहेको बताउनुभयो । उहाँले विभिन्न चाडको अवसरमा शिक्षकहरुको स्तरवृद्धी, बढुवा लगायतमा सफलता सहित शुभकामना व्यक्त गर्नुभएको थियो ।
कार्यक्रम नेपाल राष्ट्रिय शिक्षक संगठन देवचुलीका उपाध्यक्ष दोलकान्त अर्यालले स्वागत मन्तव्य राख्नुभएको थियो भने सो कार्यक्रमको संचालन नेपाल राष्ट्रिय शिक्षक संगठन देवचुलीका सचिव सोमनारायण काफ्लेले गर्नुभएको थियो । नेपाल राष्ट्रिय शिक्षक संगठनमा देवचुली नगरपालिकाका विभिन्न विद्यालयका २१३ जना शिक्षकहरु आबद्ध रहेका छन् ।
