सेन्ट्रल कलेज अन्डर- २० फुटबल प्रतियोगिता : बुधबार जन ज्योति माध्यमिक विद्यालय विजयी

देवचुली । देवचुलीमा संचालित सेन्ट्रल कलेज नाईन `ए´ साइड अन्डर- २० फुटबल प्रतियोगितामा बुधबार जन ज्योति माध्यमिक विद्यालय विजयी भएको छ । धौलागिरी प्रकृति युवा क्लबको आयोजनामा महाराजा सामुदायिक वनको कार्यालयसँगै रहेको खेलमैदानमा जन ज्योति माध्यमिक विद्यालयका विरुद्ध धौलागिरी प्रकृति युवा क्लब ( बी ) बिच भएको खेलमा जन ज्योति माध्यमिक विद्यालय विजयी भएको हो। खेलमा जन ज्योतिले आयोजक बी लाई ३-२ गोल अन्तरले हराउँदै दोस्रो चरणमा प्रवेश गरेको हो। आजको खेलमा जन ज्योति माध्यमिक विद्यालयका अभिषेक जोशी म्यान अफ दि म्याच भएका छन् । प्रतियोगितामा मुख्य प्रायोजक सेन्ट्रल कलेज भरतपुर रहेको आयोजकले जनाएको छ ।

२० वर्ष मुनिका खेलाडीहरुको सहभागिता रहेको प्रतियोगितामा प्रथम हुने टिमले २० हजार रुपैयाँ नगदसहित मेडल, ट्रफी र प्रमाणपत्र प्राप्त गर्नेछ भने द्वितीय हुने टिमले १० हजार रुपैयाँसहित मेडल, ट्रफी र प्रमाणपत्र प्राप्त गर्नेछ । त्यसै गरि उत्कृष्ट खेलाडी, सर्वोकृष्ट गोलरक्षक तथा सर्वाधिक गोलकर्तालाई पुरस्कारको व्यवस्था रहेको छ । प्रतियोगिता अन्तरगत बिहीबार चन्द्रमुखी युवा क्लब अमलटारीका विरुद्ध सेन ठकुरी ट्राभल रजहरसँग खेल हुने आयोजक क्लबका अध्यक्ष भिम सुबेदीले जानकारी दिए ।