कावासोतीमा स्कुल भ्यानमा आगलागी

कावासोती । नवलपुरमा एक निजी स्कुलको भ्यानमा आगलागी भएको छ । कावासोती नगरपालिका ५ मा रहेको लर्डबुद्ध बोर्डिङ स्कूलको बा ७ च ५९९३ नम्बरको स्कुल भ्यानमा आज दिउँसो सवा ३ बजे अचानक आगलागी भएको प्रहरीले जनाएको छ ।

जिल्ला प्रहरी कार्यालय नवलपुरका सूचना अधिकारी वेदबहादुर पौडेलका अनुसार बाटोमा सुकाएको पराल भ्यानको इन्जिनमा अड्किए पछि घर्षण हुँदा निस्केको आगोले भ्यानमा आगलागी भएको हो । मन्टेश्वरीमा अध्ययनरत १२ जना विद्यार्थीलाई छाडेर फर्कने क्रममा आगलागी भएको हुँदा कुनै मानवीय क्षति नभएको प्रहरीले जनाएको छ । भ्यानमा लागेको आगो निभाउने क्रममा चालक कावासोतीका रोहित महतोको दुवै हात सामान्य जलेको र उनको स्थानीय मेडिकलमा उपचार भएको छ ।

स्कुल भ्यान आगलागीबाट पूर्ण रुपमा नष्ट भएको र करिब ५ लाख रुपैयाँ बराबरको क्षति भएको प्रहरीले जनाएको छ । जिल्ला प्रहरीले घटना बारेमा थप अनुसन्धान भईरहेको जनाएको छ ।