वडास्तरीय फुटबल प्रतियोगिता : देवचुली १ र देवचुली ११ सेमिफाइनल प्रवेश

देवचुली। देवचुली नगरपालिकामा संचालित वडास्तरीय फुटबल प्रतियोगितामा बिहीबार भएका खेलमा देवचुली १ र देवचुली ११ विजयी हुँदै सेमिफाइनल प्रवेश गरेका छन् । देवचुली नगर युवा तथा खेलकुद विकास समितिको आयोजना तथा वडा युवा तथा खेलकुद विकास समिति देवचुली ८ को सह आयोजनामा सेन्टर प्लट खेल मैदानमा संचालित प्रतियोगिताको बुधबारको पहिलो क्वाटर फाइनल खेलमा देवचुली ११ देवचुली ९ लाई ट्राइबेकरमा हराउँदै दोस्रो चरणमा प्रवेश गरेको हो । निर्धारित समयको खेलमा दुवै समुहबाट गोलरहित भएपछि खेल ट्राईबेकरमा गएको हो । ट्राइबेकरमा देवचुली ११ ले देवचुली ९ लाई ३-२ गोल अन्तरले हराउँदै विजयी भएको हो ।

त्यसै गरि बिहीबार भएको देवचुली १ का विरुद्ध देवचुली १३ बीचको दोस्रो क्वाटर फाइनल खेलमा देवचुली १ विजयी भएको छ । देवचुली १ ले देवचुली १३ लाई हराउँदै सेमिफाइनल प्रवेश गरेको हो। देवचुली १ ले देवचुली १३ लाई १-० गोल अन्तरले हराउँदै विजयी भएको हो। खेलमा देवचुली १ का सनसाइन मल्लले गोल गरेका थिए ।

बुधबार भएको पहिलो खेलमा देवचुली ११ का समिर श्रेष्ठ म्यान अफ दि म्याच भएका थिए भने दोस्रो खेलमा देवचुली १ का सनसाइन मल्ल म्यान अफ दि म्याच भएका थिए।

देवचुली नगरपालिका भित्रका १६ वडाका १७ टिमबीच प्रतिष्पर्धा हुने प्रतियोगितामा प्रथम हुने वडाले नगद ४० हजार रुपैयाँसहित मेडल,प्रमाणपत्र र ट्रफी प्राप्त गर्नेछ भने उपबिजेता हुने वडाले नगद २० हजार रुपैयाँसहित मेडल,प्रमाणपत्र र ट्रफी प्राप्त गर्नेछ।त्यसै प्रतियोगितामा सेमिफाइनलमा पुग्ने वडाले नगद ५ हजार रुपैयाँ प्राप्त गर्नेछ। प्रतियोगितामा प्रत्येक दिनको उत्कृष्ट खेलाडीलाई पुरस्कारको व्यवस्था रहेको वडा युवा तथा खेलकुद विकास समिति देवचुली ८ का अध्यक्ष सुरज सोतीले बताए।प्रतियोगिता अन्तर्गत शुक्रबार सेमिफाइनलको पहिलो खेल देवचुली १५ का विरुद्ध देवचुली १६ र दोस्रो खेल देवचुली १ का विरुद्ध देवचुली ११ बिच हुने आयोजकले जनाएको छ।