वडास्तरीय फुटबल प्रतियोगिता : मंगलबार देवचुली ५ र देवचुली १५ विजयी

देवचुली। देवचुली नगरपालिकामा संचालित वडास्तरीय फुटबल प्रतियोगितामा मंगलबार देवचुली ५ र देवचुली १५ विजयी भएको छन् । देवचुली नगर युवा तथा खेलकुद विकास समितिको आयोजना तथा वडा युवा तथा खेलकुद विकास समिति देवचुली ८ को सह आयोजनामा सेन्टर प्लट खेल मैदानमा संचालित प्रतियोगिताको मंगलबारको पहिलो खेलमा देवचुली ५ ले देवचुली ६ लाई ट्राइबेकरमा हराउँदै दोस्रो चरणमा प्रवेश गरेको हो । निर्धारित समयको खेलमा दुवै समुहबाट १/१ को बराबरी गोल भएपछि खेल ट्राईबेकरमा गएको हो । ट्राइबेकरमा देवचुली ५ ले देवचुली ६ लाई हराउँदै विजयी भएको हो । त्यसै गरि मंगलबार भएको देवचुली ८ का विरुद्ध देवचुली १५ बीचको दोस्रो खेलमा देवचुली १५ विजयी भएको छ । खेलमा देवचुली १५ ले देवचुली ८ लाई ७-१ गोल अन्तरले हराउँदै विजयी भएको हो।

देवचुली नगरपालिका भित्रका १६ वडाका १७ टिमबीच प्रतिष्पर्धा हुने प्रतियोगितामा प्रथम हुने वडाले नगद ४० हजार रुपैयाँसहित मेडल,प्रमाणपत्र र ट्रफी प्राप्त गर्नेछ भने उपबिजेता हुने वडाले नगद २० हजार रुपैयाँसहित मेडल,प्रमाणपत्र र ट्रफी प्राप्त गर्नेछ।त्यसै प्रतियोगितामा सेमिफाइनलमा पुग्ने वडाले नगद ५ हजार रुपैयाँ प्राप्त गर्नेछ। प्रतियोगितामा प्रत्येक दिनको उत्कृष्ट खेलाडीलाई पुरस्कारको व्यवस्था रहेको वडा युवा तथा खेलकुद विकास समिति देवचुली ८ का अध्यक्ष सुरज सोतीले बताए।प्रतियोगिता अन्तर्गत बुधबारबाट क्वाटरफाईनलका खेलहरु सुरु हुनेछन् ।क्वाटर फाइनलको पहिलो खेल देवचुली ७ का विरुद्ध देवचुली १५ र दोस्रो खेल देवचुली ५ का विरुद्ध देवचुली १६ बिच हुने आयोजकले जनाएको छ।