वडास्तरीय फुटबल प्रतियोगिता : शनिबार देवचुली १३ र देवचुली १६ विजयी

देवचुली। देवचुली नगरपालिकामा संचालित वडास्तरीय फुटबल प्रतियोगितामा शनिबार देवचुली १३ र देवचुली १६ विजयी भएको छ।देवचुली नगर युवा तथा खेलकुद विकास समितिको आयोजना तथा वडा युवा तथा खेलकुद विकास समिति देवचुली ८ को सह आयोजनामा सेन्टर प्लट खेल मैदानमा संचालित प्रतियोगिताको शनिबारको पहिलो खेलमा देवचुली १३ ले देवचुली ४ लाई हराउँदै दोस्रो चरणमा प्रवेश गरेको हो। खेलमा देवचुली १३ ले देवचुली ४ लाई २-१ गोल अन्तरले हराउँदै विजयी भएको हो। देवचुली १३ बाट टीका मगर र आशिष चौधरीले १/१ गोल गरेका थिए भने देवचुली ४ बाट डिलबहादुर सारु मगरले गोल गरेका थिए।

त्यसै गरि आज भएको देवचुली १२ का विरुद्ध देवचुली १६ बीचको दोस्रो खेलमा देवचुली १६ विजयी भएको छ। खेलमा देवचुली १६ ले देवचुली १२ लाई ४-१ गोल अन्तरले हराउँदै विजयी भएको हो। देवचुली १६ बाट दिवस श्रेष्ठले ३ गोल र खुमबहादुर मल्लले १ गोल गरेका थिए भने देवचुली १२ बाट किस्मत शाहीले गोल गरेका थिए।

आजको पहिलो खेलमा देवचुली १३ का टीका मगर म्यान अफ दि म्याच घोषित भएका थिए भने दोस्रो खेलमा देवचुली १६ का दिवस श्रेष्ठ म्यान अफ दि म्याच घोषित भएका थिए ।

देवचुली नगरपालिका भित्रका १६ वडाका १७ टिमबीच प्रतिष्पर्धा हुने प्रतियोगितामा प्रथम हुने वडाले नगद ४० हजार रुपैयाँसहित मेडल,प्रमाणपत्र र ट्रफी प्राप्त गर्नेछ भने उपबिजेता हुने वडाले नगद २० हजार रुपैयाँसहित मेडल,प्रमाणपत्र र ट्रफी प्राप्त गर्नेछ।त्यसै प्रतियोगितामा सेमिफाइनलमा पुग्ने वडाले नगद ५ हजार रुपैयाँ प्राप्त गर्नेछ। प्रतियोगितामा प्रत्येक दिनको उत्कृष्ट खेलाडीलाई पुरस्कारको व्यवस्था रहेको वडा युवा तथा खेलकुद विकास समिति देवचुली ८ का अध्यक्ष सुरज सोतीले बताए।

प्रतियोगिता अन्तर्गत आइतबार पहिलो खेल देवचुली ११ का विरुद्ध देवचुली १४ र दोस्रो खेल देवचुली ७ का विरुद्ध देवचुली १७ बिच हुने आयोजकले जनाएको छ।