कुमसोतका विद्यार्थीलाई न्यानो कपडा वितरण

देवचुली।देवचुली नगरपालिका वडा नम्बर ६ कुमसोतमा रहेको सरस्वती आधारभूत विद्यालयका सम्पूर्ण विद्यार्थीलाई न्यानो कपडा वितरण गरिएको छ। अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) देवचुली नगर कमिटीद्वारा मंगलबार विद्यालयमा न्यानो कपडा वितरण गरिएको हो। देउसी भैलोबाट संकलन गरेको रकमबाट न्यानो कपडा वितरण गरिएको अनेरास्ववियु देवचुलीका अध्यक्ष सुजन भुसालले बताए ।

चिसोका कारण कोही पनि बालबालिकाको पढाईमा असर नहोस् भनेर आफुहरुले तिहारको समयमा संकलन गरेको केही रकमबाट कार्यक्रम तय गरिएको उनले बताए ।

अनेरास्ववियु देवचुलीका अध्यक्ष सुजन भुसालको अध्यक्षतामा भएको कार्यक्रममा अनेरास्ववियु नवलपुरका अध्यक्ष विष्णु पौडेलको प्रमुख आतिथ्यता रहेको थियो । त्यसै गरि कार्यक्रममा अनेरास्ववियु नवलपुरका उपाध्यक्ष सौगात भुसाल,सरस्वती आधारभूत विद्यालय व्यवस्थापन समितिका अध्यक्ष पुरनसिं सोमै,प्रधानाध्यापक तुलसी भट्टराई लगायतको उपस्थिति रहेको थियो।

न्यानो कपडा वितरण कार्यक्रममा बोल्दै अनेरास्ववियु नवलपुरका अध्यक्ष विष्णु पौडेलले अनेरास्ववियु देवचुलीले गरेको रचनात्मक कार्यको प्रशंसा गरेका थिए। अनेरास्ववियु सदैव विद्यार्थीहरुको हक अधिकारको लागि आवाज उठाइरहेको र आगामी दिनमा पनि नगर कमिटीले रचनात्मक काम गर्नका लागि उनले शुभकामना दिएका थिए ।