देवचुलीमा वडा स्तरीय फुटबल प्रतियोगिता हुँदै

देवचुली। देवचुली नगरपालिकामा वडा स्तरीय फुटबल प्रतियोगिता हुने भएको छ। देवचुली नगरपालिका युवा तथा खेलकुद विकास समितिको आयोजना र देवचुली ८ वडा युवा तथा खेलकुद विकास समितिको सह आयोजनामा पुस २६ गतेदेखि माघ ६ गतेसम्म देवचुली ७ को सेन्टर प्लट खेल मैदान रामबासमा प्रतियोगिता सुरु गर्न लागिएको हो।प्रतियोगितामा पुरुषतर्फ देवचुली नगरपालिका भित्रका वडाहरुबीच र महिलातर्फ पालिकास्तरीय प्रतिष्पर्धा हुने आयोजक समितिका अध्यक्ष चन्द्रबहादुर थापाले जानकारी दिए।

प्रतियोगितामा प्रथम हुने वडाले नगद ४० हजार रुपैयाँसहित मेडल,प्रमाणपत्र र ट्रफी प्राप्त गर्नेछ भने उपबिजेता हुने वडाले नगद २० हजार रुपैयाँसहित मेडल,प्रमाणपत्र र ट्रफी प्राप्त गर्नेछ।त्यसै प्रतियोगितामा सेमिफाइनलमा पुग्ने वडाले नगद ५ हजार रुपैयाँ प्राप्त गर्नेछ। महिलातर्फ पुरस्कारको राशि पछि घोषणा गरिने आयोजकले जनाएको छ।प्रतियोगितामा प्रत्येक दिनको उत्कृष्ट खेलाडीलाई पुरस्कारको व्यवस्था रहेको छ।