देवचुलीमा आजबाट वडा स्तरीय भलिबल प्रतियोगिता सुरु

देवचुली। देवचुली नगरपालिकामा आजबाट वडा स्तरीय भलिबल प्रतियोगिता सुरु भएको छ। देवचुली नगरपालिका युवा तथा खेलकुद विकास समितिको आयोजना र देवचुली ५ वडा खेलकुद विकास समितिको सह आयोजनामा प्रतियोगिता सुरु भएको हो।आज मंसिर २८ गतेदेखि ३० गतेसम्म देवचुली ५ को कदमपुर खेल मैदानमा प्रतियोगिता सुरु गरिएको हो।

प्रतियोगिताको देवचुली नगरपालिकाका उप प्रमुख पार्वता तिवारीले उदघाटन गर्नुभएको हो। उद्घाटन कार्यक्रममा देवचुली नगरपालिकाका प्रमुख प्रशासकीय अधिकृत मुकुन्द शर्मा,वडा अध्यक्षहरु,कार्यपालिका सदस्यहरु,विभिन्न संघसंस्थाका प्रतिनिधि लगायतको उपस्थिति रहेको थियो। प्रतियोगितामा देवचुली नगरपालिका भित्रका वडाहरुबीच प्रतिष्पर्धा हुने आयोजक समितिका अध्यक्ष चन्द्रबहादुर थापाले बताउनुभयो ।

प्रतियोगिता अन्तर्गत पहिलो चरणको खेलमा देवचुली ५ (कालो),देवचुली ७,देवचुली ८ र देवचुली ९( रातो) विजयी भएका छन् । देवचुली ५ ले देवचुली १० लाई,देवचुली ७ ले देवचुली ५ (पहेँलो ) लाई, देवचुली ८ ले देवचुली ४ लाई र देवचुली ९(रातो) ले देवचुली १७ लाई हराएका थिए। त्यसै गरि आज भएको पहिलो क्वाटर फाइनलमा देवचुली ९ (रातो) ले देवचुली ६ लाई हराउँदै सेमिफाइनल प्रवेश गरेको छ।

प्रतियोगितामा प्रथम हुने वडाले नगद २० हजार रुपैयाँसहित मेडल,प्रमाणपत्र र ट्रफी प्राप्त गर्नेछ भने उपबिजेता हुने वडाले नगद १२ हजार रुपैयाँसहित मेडल,प्रमाणपत्र र ट्रफी प्राप्त गर्नेछ।त्यसै प्रतियोगितामा तृतीय हुने वडाले नगद ५ हजार रुपैयाँसहित मेडल,प्रमाणपत्र र ट्रफी प्राप्त गर्नेछ।प्रतियोगिताको उत्कृष्ट खेलाडीलाई नगद पुरस्कारको व्यवस्था रहेको नगर युवा तथा खेलकुद विकास समितिका सचिव प्रकाश काफ्लेले जानकारी दिनुभयो।प्रतियोगिता अन्तर्गत शुक्रबार देवचुली १२ का विरुद्ध देवचुली ५ (हरियो),देवचुली ९ (हरियो) का विरुद्ध देवचुली १४,देवचुली ७ का विरुद्ध देवचुली ८ बिच खेल हुने आयोजकले जनाएको छ।