१५ बुँदे घोषणापत्र जारी गर्दै सकियो तेस्रो नवलपुर बालिका सम्मेलन

नवलपुर।गण्डकी प्रदेश साँसद पद्मा जिसी श्रेष्ठले बाल अधिकार र किशोरी अधिकारका सवालमा तिनै तहको सरकारको अपनत्व रहने गरी नीतिगत तहमा आफूले भूमिका खेल्ने प्रतिबद्धता ब्यक्त गरेकी छन् ।

देवचुलीको दलदलेमा आयोजित तेस्रो नवलपुर बालिका सम्मेलनको उद्घाटन सत्रमा बोल्दै सांसद जिसीले गण्डकी प्रदेश सभामा किशोर किशोरीका विषयमा धेरै नीति नियमहरु बनिसकेका भए पनि केही बाँकी रहेको बताउँदै ति बन्दै गरेका नीतिहरुमा किशोर किशोरी देखि हरेक तप्काका नीति निर्माणमा भूमिका निर्वाह गर्ने बताएकी हुन् ।
उनले ति नीति निर्माण गर्दा सरोकार पक्षसँग सल्लाह, छलफल, सुझाव लिएर सँगसँगै हातेमालो गर्ने बताईन् ।

नवलपुर किशोरी सञ्जालकी अध्यक्ष विद्या ढुंगानाको अध्यक्षता तथा साँसद जिसीको प्रमुख आतिथ्यतामा भएको पहिलो सत्रको कार्यक्रममा किशोरी सशक्तिकरण अभियानमा लाग्न नपाएका भर्खर युवावस्थामा प्रवेश गरेका विभिन्न क्षेत्रका युवती र अभियानमा जोडिएर अभियानको सहजीकरणमा लागेका किशोरीहरुबीच सामुहिक छलफल भएको थियो । छलफलमा समग्र किशोरीहरुको समस्या, चुनौती, अवसर, सम्भावनाको चित्रण देखिएको थियो । उनीहरुले आफ्ना अनुभव समेत राखेका थिए ।

कावासोतीबाट सहभागी मनिषा पौडेलले किशोरी शसक्तिकरणका अभियानले अहिलेका बालबालिकामा उर्जा थपेको बताउँदै बैनीहरुको क्षमतामा निकै सुधार आएको महसुस गरेको सुनाईन् । पब्लिक स्पीकिङमा अब्बल पौडेलले आफूले किशोरी अभियानको मिसन सञ्चालन गरेका संघसंस्थाको दिशानिर्देश नपाए पनि अव यस्ता गतिविधिलाई तिव्र गतिशिलतामा फराकिलो दायरामा पुर्याउन सुझाईन।

देवचुलीकी एलिना केसीले पनि अहिलेका बालबालिका र किशोरीले प्राप्त गरेका अवसर आफूले नपाएकोले छिटो जन्मिए कि भन्ने महसुस गरिन् । सञ्चार क्षेत्रमा क्रियाशील केसीले सामाजिक रुपको अलावा अभिभावकका बीचमै पनि खुलेर कुरा गर्न नसक्ने अवस्था पार गरेको अनुभव बाड्दै अहिलेको पुस्तामा देखिएको दृढताले खुसी लागेको बताईन् ।

देवचुलीकी डाक्टर गितु गैरेले किशोरावस्थामा हुने, शारीरिक, मानसिक, संवेगात्मक परिवर्तनका विषयमा खुलेर ब्यक्त गर्न पनि नसक्ने र विद्यालयमा समेत ति विषयहरु खासै नसिकाउँदा आफैले जान्नुपर्ने परिस्थिति रहेको बताईन् ।

अभियानमा जोडिएर आफुभन्दा तल्लो पुस्तालाई अभियानमा स्वयंसेवी अभियान्ताका रुपमा लागेका रुपन्देहीकी सुनिता हरिजनले आफू किशोरावस्थामा चलिरहदा अहिले नै विभिन्न सामाजिक क्षेत्र, समुह, सञ्जालहरुमा बसेर अनुभव संगाल्ने अवसर प्राप्त गरेको बताईन् । यद्यपि, अझै थुप्रै बालबालिकालाई शसक्तिकरणको अभियानमा पहुँच पुर्याउन नसकिएकोले स्थानीय तह गम्भीर हुनुपर्ने सुझाव दिईन् ।

कावासोतीकी आशा बिकले आफू किशोरी शसक्तिकरणको अभियानमै जोडिएका कारण पछाडि बसेर सुन्ने आशा अहिले अगाडी बसेर सुनाउने बनेको अनुभव राखिन् । कार्यक्रम सञ्चालक नवलपुर किशोरी सञ्जालकी सदस्य एवं किशोरी शसक्तिकरण अभियानकी अभियन्ता रेजिना घर्तीमगरले सहजीकरण गरेको सामुहिक छलफलपछि बोल्ने बक्ताहरुले बालबालिका र किशोरीको सवालमा गर्नुपर्ने सामाजिक बिकासमा गरिने लगानीको प्रतिफल दिर्घकालिन हुनेमा कुनै सन्देह नरहेको प्यानल छलफलमा सहभागीहरुले ब्यक्त गरेका अनुभवले पुष्टि गरेको धारणा राखे ।

उद्घाटन सत्रपछि आयोजित दोस्रो चरणको समापन समारोहले १५ बुँदे घोषणा पत्र जारी गरेको छ । राष्ट्रिय गाउँपालिका महासंघका अध्यक्ष एवं हुप्सेकोट गाउँपालिका अध्यक्ष लक्ष्मीदेवी पाण्डे, देवचुली नगरपालिका उपप्रमुख पार्वता तिवारी, कावासोती नगरपालिका उपप्रमुख फूलकुमारी थनेत, मध्यविन्दु नगरपालिका उपप्रमुख पूणर्कला चौधरी, जिल्ला बाल अधिकार समिति नवलपुरका अध्यक्ष नारायणप्रसाद पौडेल,गण्डकी प्रज्ञा प्रतिष्ठानका सदस्य डा. देवकी आचार्य लगायतको उपस्थितिमा बाल तथा किशोरी अधिकारलाई अझ प्रभावकारी बनाउन सरोकारवाला पक्ष र निकायलाई ध्यानाकर्षण गराउने ब्यहोराको घोषणापत्र समारोहको अध्यक्षता गरेकी नवलपुर किशोरी सञ्जालकी अध्यक्ष विद्या ढुंगानाले वाचन गरेकी थिईन् ।

युवा, बालबालिका तथा किशोरीका सवालमा क्रियाशील जागृति बाल तथा युवा सरोकार नेपाल र क्यान्नालन स्वीजरल्याण्ड, केयर नेपालको सहयोगमा सम्पन्न भएको कार्यक्रममा स्वागत तथा कार्यक्रमको औचित्यका बारेमा जागृति बाल तथा युवा सरोकार नेपालका अध्यक्ष तिलोत्तम पौडेलले प्रकाश पारेका थिए ।एक दिवसीय बालिका सम्मेलनमा कपिलवस्तु, चितवन र रुपन्देहीका किशोरी सञ्जालका पदाधिकारी अभियन्ता समेतको उपस्थिति रहेको थियो।