नवलपुर ट्राफिकको यात्रुबाहक सवारीमा चेकजाँच

नवलपुर। नवलपुर ट्राफिक प्रहरीले यात्रुबाहक सवारीको चेकजाँच बढाएको छ । जिल्ला ट्राफिक प्रहरी प्रमुख प्रहरी निरीक्षक अच्युतराज आचार्यको सक्रियतामा जिल्लाको ग्रामीण क्षेत्र र मुख्य राजमार्गमा चल्ने सवारीहरुको चेकजाँच बढेको हो । आइतबार जिल्लाको देवचुलीमा बुटवल–नारायणगढ सडक खण्ड अन्तर्गत सञ्चालन हुने यात्रुबाहक सवारी साधनहरुमा विशेष अनुगमन गरिएको जिल्ला ट्राफिक प्रहरी प्रमुख अच्युतराज आचार्यले बताए ।

जनप्रतिनिधि ,यातायात व्यवसायी सहित सवारीको चेकजाँच गरेको ट्राफिक प्रमुख आचार्यले जानकारी दिए । चेकजाँचमा सवारीहरुले भाडादर टाँस गरे/नगरेको, आरक्षण सिटको कार्यान्वयन, बढी भाडा लिएको/नलिएको तथा सवारी साधनमा फोहोर व्यवस्थापनका लागी डस्टविन राखे/नराखेको सम्बन्धमा अनुगमन गरिएको ट्राफिक प्रमुख आचार्यले बताए । चेकजाँचमा चालक तथा यात्रुहरु गरी ३ सय २० जना लाई ट्राफिक नियम सम्बन्धी प्रशिक्षण प्रदान गर्नुका साथै “स्वच्छ सडक अभियान” अन्तर्गत ७ वटा सवारी साधनहरुलाई डस्टविन समेत वितरण गरिएको आचार्यले बताए ।