संस्थापककाे जन्मदिनमा देवचुलीको दिव्यज्योति आधारभूत विद्यालयलाई लायन्सकाे पुस्तकदान

चितवन।लायन्स इन्टरनेशनलका संस्थापक अध्यक्ष मेल्भिन जोन्सको जन्मजयन्तीका अवसरमा ज्ञानमूलक पुस्तकहरु वितरण गरिएको छ । लायन्स क्लब अफ नारायणगढ बालकुमारीले लायन्स इन्टरनेशनलका संस्थापक जोन्सको १४४ औँ जन्मजयन्तीको अवसर पारेर देवचुली-१२ मा रहेको दिव्यज्योति आधारभूत विद्यालयलाई ज्ञानमूलक पुस्तकहरू उपलब्ध गराएको हो । नारायणगढस्थित सम्पूर्ण किताबमा मंगलबार बिहान आयोजना गरिएको कार्यक्रममा विद्यार्थीहरूलाई सिकाइमा सहयोग पुग्ने विभिन्न बिधाका बालसाहित्यका १४४ थान पुस्तक क्लबका अध्यक्ष रामचन्द्र सापकोटाले विद्यालयका प्रतिनिधि सञ्जीव तिवारीलाई उपलब्ध गराए ।

पुस्तक वितरण कार्यक्रममा प्रमुख अतिथि लायन्स ईन्टरनेशनल डिष्ट्रिक्ट ३२५ आरका सिद्धार्थलाल चुकेले मेल्भिन जोन्सको जन्मजयन्तीमा पुस्तक वितरण जस्तो सामाजिक काम गरेकोमा क्लब परिवारलाई धन्यवाद दिए । अतिरिक्त पुस्तकले विद्यार्थीलाई ज्ञान आर्जनमा सहजीकरण हुने पनि चुकेले बताए । विशेष अतिथि लायन्स ईन्टरनेशनल डिष्ट्रिक्ट ३२५ आर द्वितीय भाइस डिस्ट्रीक्ट गभर्नर दिनानाथ न्यौपानेले सामाजिक सेवाका विभिन्न प्रकारमध्ये पुस्तक वितरण सबैभन्दा उत्कृष्ट रहेको बताए ।

कार्यक्रममा अतिथिको रूपमा लायन्स ईन्टरनेशनल डिष्ट्रिक्ट ३२५ आरका पिआरओ ईन चिफ बालगोपाल चुके र जोन चेयर पर्सन हरिराम पौडेललगायतको उपस्थिति थियो ।

विद्यालयका प्रतिनिधि शिक्षक सञ्जीव तिवारीले लायन्स क्लबले आफ्नो विद्यालयलाई निरन्तररूपमा सहयोग उपलब्ध गराउँदै आएको बताउँदै यो किसिमको सहयोगले विद्यालय परिवार र विद्यार्थीलाई समेत हौसला मिलेको बताए । लायन्स क्लब अफ नारायणगढ बालकुमारीले श्री दिव्यज्योति आधारभूत विद्यालयमा छात्रवृत्ति अक्षय कोष स्थापना गर्नुका साथै कम्प्युटर वितरण र स्टेशनरी वितरण जस्ता विविध कार्यक्रमहरु यसअघि पनि गरेको तिवारीले बताए । कार्यक्रमलाई शेरबहादुर पौडेलले सहजीकरण गरेका थिए ।