शिक्षकले यौन दुर्व्यवहार गरेको भन्दै अरोमाका विद्यार्थी आन्दोलित

चितवन।भरतपुर महानगरपालिका १० मा रहेको अरोमा कलेज मंगलबार दिनभर तनावग्रस्त रह्यो । विद्यालय परिसरमा ठूलो संख्याका नेपाल प्रहरी र शसस्त्र प्रहरी तैनाथ थिए । विद्यार्थीहरु कलेज पोसाकमै आन्दोलनरत थिए । ‘वि निड जस्टिस, पिडीतलाई न्याय दे’ जस्ता नारा लगाइरहेका विद्यार्थीहरु आक्रोसित हुँदै न्यायको माग गरिराखेका थिए ।

अरोमा कलेजमा कम्प्युटर शिक्षक रामकृष्ण सुवेदीले छात्राहरुमाथि यौनदुर्व्यवहारको गरेको भन्दै विद्यार्थीहरु यसरी दिनभर आन्दोलनमा उत्रिएका हुन् । गत शुक्रबार कक्षा ११ व्यवस्थापन संकाय पढ्ने एक छात्राले शिक्षक सुवेदीले यौन दुर्व्यवहार गरेको भन्दै कलेज प्रशासनमा उजुरी दिएकी थिइन् । तर कलेज प्रशासनले शिक्षकलाई कानुनी कठघरामा उभ्याउनलाई पहल नगरेको भन्दै विद्यार्थीहरु आन्दोलनमा उत्रिएका हुन् । सोही कलेजको कक्षा ११ मा पढ्ने एक विद्यार्थीले शिक्षक सुवेदीले कम्प्युटर ल्याबमा सिकाइको क्रममा संवेदनशील अंगमा छोएको भन्दै उजुरी दिएकी थिइन् । कक्षा ११ मा पढ्ने एकछात्राले एकपटक मात्रै नभएर पटकपटक ती शिक्षकले संवेदनशील अंगमा छुन खोज्ने, धाप मार्ने, गाला सुम्सुआउन खोज्ने जस्ता हर्कत देखाउने गरेको सुनाइन् । ‘हामीलाई ल्याबमा पढ्ने बेला नराम्रोसँग छुन खोज्नुहुन्थ्यो । हामीले पढेको कुरा नजानेर सोध्दा कस्तो राम्रो हात भन्दै मुसार्न खोज्नुहुन्थयो । तर हामीले प्रतिकार गरिरह्यौँ । शुक्रबार मेरै साथीलाई नराम्रोसँग प्राइभेट पार्टमा छोएपछि उस्ले कलेजमा उजुरी गरेकी थिइ ।’ उनले भनिन्,‘अहिले हामीले बोलेपछि १२ कक्षामा पढ्ने दिदीहरुले पनि त्यो सरले यस्तै नराम्रो व्यवहार गर्नुभएको कुरा खोल्नुभएको छ ’ उनले भनिन् । कलेजमा उजुरी गरेपनि ती शिक्षकलाई कलेजले दुई दिनको ‘सस्पेन्ड’को नाटक गरेर कानुनी पक्रियामा नलगेको उनले आरोप लगाइन् । ‘म्यानेजमेन्ट ब्लकको हेडसरलाई हामीले खबर गरेका थियौँ तर उहाँले सस्पेन्ड गरेको मात्र भन्नुभयो । अहिले हामीले बोलेनौँ भने अब आउने ११ कक्षाका बहिनीहरुले पनि त्यही भोग्नुपर्छ त्यसैले हामीले बोलेका हौँ ।’ उनले आन्दोलनबारे जानकारी दिँदै भनिन् । पीडित विद्यार्थीसँग माफी माग्नुपर्ने र कानुनी कारबाहीमा पिडकलाई लग्नुपर्ने आफूहरुको माग रहेको उनले सुनाइन् । ‘पीडितको खुट्टा ढोगेर माफ माग्नुपर्छ र कानुनी कारबाहीमा लग्नुपर्छ’ उनले भनिन् । विद्यार्थीहरुले गरेको आन्दोलनमा प्रहरीले लाठीचार्ज गरेर ज्यादती गरेको पनि उनको आरोप थियो । सोही कलेजमा कक्षा १२ मा पढ्ने विवस रानाले कलेजले घटना दबाउन खोजेको बताए । ‘एकदुईचोटी भएपो पटक–पटक यस्तो घटना भइराखेको छ । कलेजले नै घटना दबाउन खोजेजस्तो लाग्छ । टिचरलाई सस्पेन्ड गर्ने छाड्ने गरेर भएन । कानुनी कारबाहीको हाम्रो माग हो ।’ उनले भने ।

कक्षा १२ मा विज्ञान संकायमा पढ्ने सलिना थापा आफ्नै कलेजमा बहिनीहरुले दुर्व्यवहार भोगेको थाहापाएपछि आन्दोलनमा उत्रिएको बताइन् । ‘हामी साइन्स पढ्नेले बल्ल थाहा पाएका हौँ । भोलि हामीलाई पनि यस्तो भोग्न नपरोस भनेर आन्दोलनमा उत्रेका हौँ ।’ उनले भनिन् । अरोमा कलेजका प्रीन्सिपल शेरबहादुर क्षेत्रीले घटनाबारे आइतबार मात्रै आफूले जानकारी पाएको र तुरुन्तै आरोपित शिक्षकलाई सोधपुछ गरि कलेजबाट निष्कासित गरेको बताउँछन् । ‘कम्प्युटर शिक्षकबाट ब्याड टचको कुरा आएकाले आइतबार व्यवस्थापन समितिसहितको बैठक बसेर निस्कासित गरेका हौँ ।’ उनले भने । विद्यार्थी र अभिभावकसँग बसेर थप छलफल गर्नेक्रममा मंगलबार विद्यार्थीहरुले आन्दोलन गर्दै कलेजको भौतिक संरचनामा पनि क्षति पुर्‍याएको उनले बताए । विद्यार्थीले कलेजको गाडी र झ्यालमा क्षति पुर्‍याएको उनले बताए । अहिले आरोपित शिक्षकलाई प्रहरीले नियन्त्रणमा लिइसकेको बताउँदै उनले आवश्यक कानुनी कारबाही र अनुसन्धानमा कलेज प्रशासनले सहयोग गर्ने बताए । ‘पीडित विद्यार्थी हाम्रो छोरी सरह हुन् । आरोपितलाई बचाउने लुकाउने कुरा हुँदैन, कसुरअनुसारको सजाय पाउनुपर्छ भन्ने हाम्रो पनि माग हो ।´ उनले भने ।

जिल्ला प्रहरी कार्यालय चितवनका प्रमुख एसपी नवराज अधिकारीले यौन दुर्व्यवहारका आरोप लागेका शिक्षकलाई पक्राउ गरिएको पुष्टि गरे । उनले भने,‘हामीले नियन्त्रणमा लिएर अनुसन्धान गरिराखेका छौँ । पीडितको उजुरी आउने क्रममा छ’, उनले भने । कायाकैरन दैनिक