व्यवसाय दर्ता तथा नवीकरण शिविर : दोस्रो दिन ४६ वटा नयाँ दर्ता तथा २९ वटा नवीकरण

देवचुली।देवचुली नगरपालिकामा बिहीबारबाट सुरु भएको व्यवसाय दर्ता तथा नवीकरण शिविरमा व्यावसाय दर्ता गर्नेको संख्या वृद्धि हुँदै गएको छ । देवचुली उद्योग वाणिज्य संघ तथा बजार व्यवस्थापन समितिको सहकार्यमा देवचुली नगरपालिकाले शुक्रबार देवचुली वडा नम्बर १६ रजहर बजारमा शिविर संचालन गरिएको हो ।

पहिलो दिनको शिविरमा ४६ वटा नयाँ दर्ता तथा २९ वटा नवीकरण गरिएको छ । सो शिविरबाट तीन लाख त्रियासी हजार सात सय पचास रुपैयाँ राजश्व संकलन भएको देवचुली नगरपालिकाका आर्थिक विकास शाखा प्रमुख शिव सापकोटाले बताए । पहिलो दिन देवचुली १७ फारम बजारमा संचालित शिविरमा २१ वटा नयाँ दर्ता तथा ३२ वटा नवीकरण भएको थियो भने करिब दुई लाख चालीस हजार राजश्व संकलन गरिएको थियो ।

सापकोटाका अनुसार शिविर नगरका विभिन्न स्थानमा संचालन गरिनेछ । देवचुली नगरपालिकाले १८ गते शनिबार सिजी गेट, १९ गते आइतबार मुण्डे/कुमसोत, २० गते सोमबार धारापानीचोक/गैंडीचोक, २१ गते मंगलबार प्रगतिनगरबजार/पृथ्वीनगरचोक, २२ र २३ गते ( बुधबार/बिहीबार) दलदलेबजारमा व्यवसाय दर्ता तथा नवीकरण शिविर गर्ने सापकोटाले बताए ।

शुक्रबार रजहरमा भएको शिविरमा देवचुली १६ वडा अध्यक्ष , वडा सदस्यहरु, देवचुली उद्योग वाणिज्य संघका प्रतिनिधि तथा देवचुली नगरपालिकाका कर्मचारीहरुको सहभागिता रहेको थियो ।