महेन्द्र राजमार्गको देवचुलीखण्ड कालोपत्रे हुँदै

राजु चापागाई, देवचुली। पूर्वपश्चिम महेन्द्र राजमार्ग अन्तरगत देवचुली खण्डमा बिग्रिएको सडक मर्मत गरिने भएको छ । सोमबार देवचुली नगरपालिकाका प्रमुख हरि न्यौपानेको पहलमा नारायणगढ – बुटवल सडक निर्माण आयोजनाका प्रतिनिधिहरुबीच भएको छलफलबाट यथाशीघ्र सडक मर्मत गरि आवागमन सहज गर्ने निर्णय भएको हो ।

गत साउन १७ गते नगरपालिकाको पहलमा निर्माण कम्पनीलाई सडक मर्मत गर्न लगाईएको र सो समयमा बाटो मर्मत गरिएको तर अव्यवस्थित तरिकाले काम गरेकाले नगरप्रमुख न्यौपानेले तुरुन्त व्यवस्थित मर्मतका लागि निर्माण कम्पनीलाई निर्देशन दिएका हुन् ।

नारायणगढ – बुटवल सडकखण्डमा पानी पर्नासाथ हिलो र घाम लाग्नासाथ धुलो उड्नुका साथै सानादेखि ठुला खाडलहरु दुर्घटनाको कारण बनेकाले नगरपालिकाले आयोजना निर्माण कम्पनीसँग छलफल गरि तुरुन्त सडक मर्मत गर्न लगाएको नगर प्रमुख न्यौपानेले बताए । सडकखण्डको स्तरोन्नतिको क्रममा बिग्रिएका सडकका कारण दैनिक सवारी दुर्घटना बढिरहेको, यात्रुहरुलाई सास्ती भैरहेकोले खाल्डाहरु पुरी कालोपत्रे गरि व्यवस्थित बनाउन निर्माण कम्पनीका प्रतिनिधिसँग मौखिक सहमति गरिएको नगर प्रमुख न्यौपानेले बताए । सडक मर्मतको काम स्थानीय निर्माण कम्पनीलाई दिईने र सोको अनुगमन नगरपालिकाले गर्ने सहमति भएको हो ।

स्थानीय निर्माण कम्पनीसँग सम्झौता गरि मर्मतको काम गरिने र देवचुली नगरपालिकाको लोकाहाहुँदै नगर क्षेत्रमा मर्मत कार्यको सुरुवात गरि जिल्लाभरि नै मर्मत गरिने चाईना स्टेट कम्पनीका सम्झौता प्रबन्धक राकेश झाले बताए । बाटो निर्माणका लागि आवश्यक पर्ने माटोको लागि नगरपालिकालाई सहजीकरण गर्नका लागि अनुरोध गरिएको पनि झाले बताए ।

देवचुली नगरपालिकाको तर्फबाट नगरप्रमुख हरिप्रसाद न्यौपाने र चाईना स्टेट कम्पनीका कार्यवाहक सम्झौता प्रबन्धक जियाङ ची, सम्झौता प्रबन्धक राकेश झा र उपशाखा खरिद प्रबन्धक सुन बीच छलफल गरिएको हो ।