आज: २०८१ मंसिर २०, बिहिबार | Thu, 05, Dec, 2024 Search
दयाराम आचार्य,
नवलपुर
कावासोती नगरपालिकाले थप २२ करोड बढी बजेट भित्राउने भएको छ । कावासोती नगरपालिकाले नेपाल शहरी शासकीय तथा पूर्वाधार आयोजना संचालन गर्ने गरि शहरी विकास तथा भवन निर्माण विभाग बिच बिहिबार २२ करोड २ लाख ४१ हजार १३१ रुपैँया बराबरको सम्झौता गरेको छ । विभागका महानिर्देशक नवराज प्याकुरेल र कावासोती नगरपालिका नगर प्रमुख चन्द्र कुमारी पुन बिच सम्झौता पत्रमा हस्ताक्षर भएको हो । सम्भौता अनुसार भौतिक निर्माण तथा स्वरोजगारका क्षेत्रमा काम हुने छ । विश्व बैंकको सहयोगमा हुने यस कार्यक्रम तीन वर्ष सम्म चल्ने कावासोती नगरपालिका प्रमुख प्रशासकिय अधिकृत रमेश घर्तीले बताउनुभयो ।
चालु आर्थिक वर्षमा दुई करोड २० लाख ,दोश्रो वर्ष १३ करोड २१ लख ४४ हजार ६७९ र तेश्रो वर्ष ६ करोड ६० लाख ७२ हजार ३३९ रुपैया बराबरको काम हुने प्रमुख प्रशासकिय अधिकृत घर्तीले बताउनुभयो । गण्डकी प्रदेशमा फलेवास र कावासोती नगरपालिकामा आयोजना संचालन हुने छ ।
कावासोती नगरपालिकामा नेपाल शहरी शासकीय तथा पूर्वाधार आयोजना संचालन हुनु आफैमा महत्वपूर्ण हुने कावासोती नगरपालिका नगर प्रमुख चन्द्र कुमारी पुनले बताउनुभयो । शहर उन्मुख रुपमा नगरपालिका अगाडी बढिरहेको सन्दर्भमा यसलाई अझै व्यवस्थित बनाउन आयोजनाबाट काम हुने उहाँले बताउनुभयो । यो संगै रोजगारी शिर्जनामा समेत आयोजना फलदायी हुने उहाँले बताउनुभयो । ‘कावासोती नगरपालिकाको शहरी सौन्दर्य कायम गराउदै यसको विकासमा आयोजना फलदायी त हुन्छनै’ नगर प्रमुख पुनले भन्नुभयो–कोभिडको असरले बढेको बेरोजगारीलाई न्यूनिकरणमा समेत ठूलो सहयोग पुग्ने विश्वास छ ।
नेपाल शहरी शासकीय तथा पूर्वाधार आयोजना मार्फत कोभिडको असरले बढेको बेरोजगारीलाई न्यूनिकरण तथा पूर्नउत्थान गराउदै रोजगारी र भौतिक विकासलाई जोडने गरि काम हुने कावासोती नगरपालिकाका आर्किटेक इन्जिनिएर पवन रुपाखेतीले बताउनुभयो ।
आयोजनाबाट सडक, नाला निर्माण, खानेपानी र सरसफाई, स्वास्थ्य ,शिक्षा, फोहर व्यवस्थापन, पार्कहरु निर्माण लगाएतका काम गर्न सकिने आर्किटेक इन्जिनिएर रुपाखेतीले बताउनुभयो ।
देशभरका ३३ वटा नगरपालिकामा आयोजना शुरु हुने छ ।आयोजनाले नेपालका रणनैतिक माध्यमिक शहरहरुमा सेवा प्रवाह र संरचनागत क्षमताको अभिवृद्धि गर्दै श्रम सघन कार्यहरु मार्फत कोभिड १९ पछिको आर्थिक पुर्नलाभलाई गति दिने मुख्य उद्येश्य राखेको छ ।
कावासोती नगरपालिकाले फागुन महिनामा मात्रै २९ करोड २ लाख ४१ हजार १३१ रुपैयाको सम्झौता गरेको छ । यस अघि यसै महिना टरुवा तालको विकासका लागि रु । ७ करोडको सम्झौता भएको थियो ।
